सोलापूर : प्रतिनिधी
जि. प. सोलापूर येथील जिल्हा आरोग्य अधिकारी डॉ. संतोष नवले यांनी उपसंचालकांच्या अधिकाराचा स्वतः गैरवापर करून जिल्हा क्षयरोग केंद्र येथील कनिष्ठ लिपीक लाडले मशाक अब्दुलगणी मुजावर यांना बेकायदेशीरपणे प्रतिनियुक्ती दिली होती. याबाबत “सत्ताकारण न्युज नेटवर्क”ने वृत्त प्रसिध्द केले, तर राष्ट्रवादी काँग्रेस शरदचंद्र पवार पक्षाचे गणेश मोरे यांनीही उपसंचालक डॉ. प्रशांत वाडीकर यांच्याकडे लेखी तक्रार दिली होती. परिणामी कनिष्ठ लिपीक लाडले मशाक अब्दुलगणी मुजावर यांची बेकायदेशीररित्या केलेली प्रतिनियुक्ती रद्द करण्याची नामुष्की जिल्हा आरोग्य अधिकारी डॉ. संतोष नवले यांच्यावर आली आहे. त्यांनी 16 जुलै 2024 रोजी सदरची प्रतिनियुक्ती रद्द केली असुन तसा आदेश जारी केला आहे.
आता “बॉम्बे नर्सिंग होम ॲक्ट”मधील गैरव्यवहाराच्या चौकशीकडे लक्ष
जिल्हा आरोग्य अधिकारी डॉ. संतोष नवले यांनी सदरची बेकायदेशीर प्रतिनियुक्ती केल्यानंतर कनिष्ठ लिपीक मुजावर यांच्याकडे “बॉम्बे नर्सिंग होम ॲक्ट”ची जबाबदारी दिली होती. जे की त्यांच्याकडे या पदाची जबाबदारी देखील देता येत नाही. दुसरीकडे जि. प. आरोग्य विभागात सक्षम अधिकारी-कर्मचारी असताना चुकीच्या पध्दतीने मुजावर यांची नियुक्ती आणि वरून चुकीचे कामकाज दिले होते. त्यामुळे मुजावर यांच्याकडे प्रतिनियुक्ती दिल्यापासुनच्या कार्यकाळातील “बॉम्बे नर्सिंग होम ॲक्ट”ची अंमलबजावणी, नविन व नुतनीकरण परवाने, त्यांच्यासाठीचे चलन वेळेत आणि बँकेतच जमा केले आहे का ? या सर्वांची खातरजमा करावी. त्यांच्या काळात ज्यांना दवाखान्यांचे नविन व नुतनीकरण परवाने दिले आहेत. त्या हॉस्पिटलची पुन्हा तपासणी करून वास्तवात असलेल्या खाटांची संख्या तपासावी. चलन वेळेत भरले आहे की स्वतः वापरले आहे, याचीही खातरजमा करावी, ज्यांना नविन आणि नुतनीकरण परवाने दिले आहेत. त्यांच्याकडून आर्थिक रक्कम उकळली असून संबंधीत हॉस्पिटलधारकांचे जबाब इन कॅमेरा घ्यावेत आणि चौकशीअंती जिल्हा आरोग्य अधिकारी डॉ. संतोष नवले आणि कनिष्ठ लिपीक लाडले मशाक अब्दुलगणी मुजावर यांना निलंबीत करून बडतर्फ करावे, अशी मागणी राष्ट्रवादी काँग्रेस शरदचंद्र पवार पक्षाचे गणेश मोरे यांनी केली होती. त्यामुळे आता प्रतिनियुक्ती रद्द झाली असली तरी पुढील चौकशी आणि त्यातील सत्य लवकरच बाहेर काढावे, अशी मागणी उपसंचालक डॉ. प्रशांत वाडीकर यांच्याकडे राष्ट्रवादी काँग्रेस शरदचंद्र पवार पक्षाचे गणेश मोरे यांनी केली आहे. त्यामुळे आता “बॉम्बे नर्सिंग होम ॲक्ट”मधील गैरव्यवहाराच्या चौकशीकडे आरोग्य विभागाचे लक्ष लागले असल्याचे दिसुन येत आहे.
डॉ. संतोष नवले आणि मुजावर यांच्या गैरकारभाराची चौकशी करून कारवाई करा
