Dhangar Reservation | अहमदनगरच्या चौंडी येथे धनगर समाजाचे आरक्षणासाठी गेल्या 21 दिवसांपासून उपोषण सुरू होते. मात्र मंत्री गिरीष महाजन यांनी मध्यस्ती करत उपोषकर्त्यांना उपोषण मागे घेण्याची विनंती केली. तसेच सरकार लवकरच यावर निर्णय घेईल असे आश्वासन दिले. त्यामुळे अखेर उपोषणकर्त्यांना उपोषण मागे घेतले आहे.
धनगर समाजाला एसटी प्रवर्गातून आरक्षण (Dhangar Reservation) देण्याची मागणी उपोषणकर्ते सुरेश बंडगर आणि अण्णासाहेब रुपनवर यांनी केली होती. या मागणीसाठी ते गेल्या 21 दिवसांपासून उपोषणाला बसले होते. यामुळे सरकारकडून अनेकदा चर्चेचे प्रयत्न करण्यात आले होते. परंतु याधून तोडगा निघाला नव्हता. उपोषणकर्त्यांची या काळात प्रकृती खालावली होती. त्यांनी उपचार घेण्यास नकार दिला असल्याने मंत्री गिरीश महाजन यांनी दुसऱ्यांदा चौंडी येथे जावून धनगर आरक्षणावर मार्ग काढण्याचा प्रयत्न केला. आणि त्यांच्या प्रयत्नांना यश आहे.
मंत्री महाजन यांनी उपोषणकर्त्यांची भेट घेऊन मुख्यमंत्री एकनाथ शिंदे यांना फोन लावून दिला. उपोषणकर्ते आणि मुख्यमंत्री शिंदे यांच्यात चर्चा झाली. मुख्यमंत्री शिंदे यांनी उपोषणकर्त्यांची समजूत काढली. यावर उपोषणकर्त्यांनी शिंदे यांच्याकडे लेखी आश्वासन मागितले. सरकारही लेखी आश्वासन देण्यास तयार झाल्याने उपोषणकर्त्यांनी उपोषण मागे घेतले.
Dhangar Reservation ची लवकरच अंमलबजावणी
“धनगर समाजाचे प्रतिनिधी आणि सरकार यांच्यात 21 सप्टेंबर 2023 रोजी सह्याद्री अतिथीगृहावर बैठक झाली. यावेळी राज्य सरकारने एकमताने त्यांना पाठिंबा दिला आणि मागणी रास्त असल्याचे सांगितले. राज्य सरकारचा पाठिंबा आहे, परंतु काही तांत्रिक अडचणीमुळे सदरची बाब न्यायप्रविष्ट आहे. त्या अडचणी सरकार सोडवेल, अशी प्रतिक्रिया गिरीश महाजन यांनी दिली. तसेच या आंदोलनादरम्यान दाखल झालेले गुन्हे मागे घेण्याची मागणी आंदोलकांनी केली होती. त्यांची मागणी मान्य करण्यात आली आहे. तसेच आवश्यकता भासल्यास धनगर समाजाच्या आरक्षणासाठी (Dhangar Reservation) निवृत्त न्यायाधीशांच्या अध्यक्षतेखाली एक समिती स्थापन केली जाणार असल्याचे मंत्री गिरीश महाजन यांनी सांगितले. तसेच 50 दिवसांच्या आत ही सर्व कारवाई पूर्ण करण्याची मागणी उपोषणकर्त्यांनी केली आहे. ती मागणीही मान्य करण्यात आली आहे.
