शिक्षक भरतीमध्ये खासगी संस्थेत मुलाखतीसह एका जागेसाठी दहा उमेदवरांना संधी

सोलापूर : प्रतिनिधी

शिक्षक भरतीत खासगी संस्थेच्या मुलाखतीसह भरण्यात येणाऱ्या 4 हजार 879 जागा आहेत. त्यासाठी शिफारस करण्याची प्रक्रिया सुरू आहे. उच्च न्यायालयाचा आदेश तसेच महाराष्ट्र खाजगी शाळा नियमावली सन 1981 च्या प्रचलित तरतुदीनुसार खाजगी शैक्षणिक संस्थेत एका जागेसाठी 3 ऐवजी आता एका जागेसाठी 10 या प्रमाणात अभियोग्यता धारक उमेदवारांना संधी उपलब्ध करून दिले जाणार आहे. त्यानुसारच सोलापूर जिल्ह्यातील 266 शिक्षकांची भरती होणार आहे.

उच्च न्यायालयाच्या आदेशानुसार आता एका जागेसाठी 10 उमेदवारांना मुलाखतीसाठी पाठविले जाणार आहे. शालेय शिक्षण विभागाने नवीन आदेश काढून एका जागेसाठी 3 उमेदवार असा निर्णय घेतला होता. परंतु तो उच्च न्यायालयाने रद्द केला आहे. शालेय शिक्षण विभागाच्या माध्यमातून शासकीय (रिक्त जागांपैकी 70 टक्के) व खासगी अनुदानित शाळांमध्ये (रिक्त जागांपैकी 80 टक्के) एकूण 21 हजार 678 शिक्षकांची पदभरती सुरू आहे. त्यातील 16 हजार 799 पदे शासकीय शाळांवरील असून त्या उमेदवारांना मुलाखतीविनाच नेमणूक मिळणार आहे.

गुणवत्ता यादीनुसार ज्यांची निवड झाली आहे. आता त्यांच्या मूळ कागदपत्रांची पडताळणी संबंधित जिल्हा परिषदांचे मुख्य कार्यकारी अधिकारी करतील. त्यानंतर महिला, दिव्यांग शिक्षकांना प्राधान्याने सोयीच्या शाळा दिल्या जातील. उर्वरित शिक्षकांना रिक्त पदांनुसार समुपदेशनाद्वारे त्या-त्या शाळांमध्ये नियुक्ती दिली जाणार आहे. या शिक्षक भरतीतून सोलापूर जिल्हा परिषदेला जवळपास 500 शिक्षक मिळणार असून 60 खासगी संस्थांमध्येही 266 शिक्षकांची भरती होणार आहे. तत्पूर्वी, खासगी संस्थांमधील शिक्षक भरतीसाठी पवित्र पोर्टलवरून निवडलेल्या उमेदवारांच्या मुलाखती पार पडतील.

खासगी संस्थांमध्ये गुणवत्ता की डोनेशन ?

-टीईटी उत्तीर्ण व शिक्षक अभियोग्यता परीक्षेत चांगले गुण घेऊन ज्या उमेदवारांनी पवित्र पोर्टलवर नोंदणी केली आहे. ज्यांनी खासगी शैक्षणिक संस्थांची निवड केली आहे. त्या उमेदवारांना संबंधित संस्थांमध्ये मुलाखती द्याव्या लागतील. सोलापूर जिल्ह्यातील 60 संस्थांमध्ये 266 शिक्षकांची भरती होणार आहे. शिक्षक पदासाठी 15 ते 20 लाखांपर्यंत डोनेशन घेतले जात असल्याची चर्चा आहे. पवित्र पोर्टलवरून भरती होणाऱ्या उमेदवारांची निवड गुणवत्तेवरून की डोनेशनवरून होणार ? याकडे सर्वांचे लक्ष लागले आहे. तसेच आमची मागणी 80 टक्के शिक्षक भरतीची आहे. वित्ती विभागाने मंजुरी दिली असताना 55 हजार शिक्षक भरती झाली पाहिजे होती. परंतु केवळ 22 हजार शिक्षक भरती होत आहे. उर्वरित भरती याच वर्षी घेण्यात यावी आणि मुलाखतीस पात्र होणाऱ्या उमेदवारांची गुणवत्तेनुसार निकष लावून त्यांची नियुक्ती करावी. परंतु आर्थिक व्यवहार करू नये. ज्यामुळे गुणवत्ताधारक उमेदवार शिक्षक होण्यापासून वंचित राहू शकेल. त्यामुळे भरती प्रक्रिया पारदर्शकपणे राबवून लवकर नियुक्ती द्यावी.

-प्रशांत शिरगुर, स्पर्धा परीक्षा समन्वय समिती, शिक्षक भरती संघटना, सोलापूर.